Flensa og saumó

Ég ætla nú að byrja á því að biðjast afsökunar á því hve langt er síðan ég bloggaði síðast. En ástæðan er sú að ég náði mér í flensu og hef varla komist á fætur í rúma viku. Þessi flensa á síðan eftir að ferðast til ykkar á norðurhveli. Kemur til ykkar í vetur. Ég get alveg óhikað mælt með bólusetningu gegn pöddunni.
Annars er allt annað gott að frétta. Við íslenska kvenfólkið í Christchurch höfum stofnað saumaklúbb, sem hittist á hálfsmánaðar fresti. Í þessu saumaklúbb erum við raunverulega að reyna að vinna eitthvað í höndunum. Ég t.d hafði það af, að kaupa prjóna og garn og stendur til að prjóna vettlinga á ófæddan bumbubúa. Menn verða að átta sig á að hér er um að ræða stórmerkilegan viðburð, því ég hef barist með kjafti og klóm gegn prjónum og saumnálum (eða hvers konar nálum) alla mína ævi. En Eftir heilt kvöldi af pepp-tali og loforðum um fullkominn stuðning saumaklúbbsmeðlima, lét ég s.s tilleiðast og keypti prjóna. Og nú hef ég setið í hálfan mánuð og prjónað slétt og brugðið, og mér var sannarlega brugðið ;) því að úr varð alls ekkert stroff (en stroff er þetta sem er neðst á vettlingunum og pró-prjónasnillingar nota þetta orð mikið ;) og það sem verra er, að þetta sem ég er að prjóna mynni afskaplega lítið á vettlinga. Ég hlakka þess vegna mikið til að fara í næsta saumaklúbb og fá góð ráð.